ISUT SARITAN TATU HIANG ITAH “KUTAT” BARA TELUK EMBAK/KATINGAN

T

atu itah Kutat te oloh ije setengah taloh tutang setengah olon. Awi te kea ie tau hinje dengan taloh tuntang tau hinje dengan itah oloh, hayak dengan kamamut manteng.

Tatu itah Kutat badukuh into teluk Embak huang Tasik Payawan. Hete ie mampendeng puduk (pasha ije inyapau ininding tuntang ilaseh hapan upak kayu). Tukep pasah te ie manampa talaga (sumur) ije ilampik tuntang inyiring dengan papan tabalien. Puji kea uluh mangatang papan tabalien te handak metun manduan, situ-sini pehe kanai, tapaksa ilekak ilabuh haluli. Eweh-eweh ije mangatang handak mandua, hingga kalute hate-hate papan tabalien masih atun ih sapai wayah tuh. Talaga te kalumbah kurang labih 5 depe. Kapanjang  Tinai kandalem ee pire-pire pandang dia puji keang.
Into tukep saran talaga te atun humbang bahenda dengan humbang biasa. Kakejau telaga te bara saran Tasik Payawan kurang labih 500 depe ije spai wayah tuh masih tege, cuman humbang bahenda ije jatun (matei.

Kutat kawin dengan Betau Nyaru/Nayu itu Rawi. Rawi te tandipah ih dengan Teluk Embak tinai kutat dia mandui huang talaga te tapi ei mandui huang Goha into kereng Balawan. Kereng Balawan te hila ngaju lewu Baun Banggo ibu kota kecamatan Kamipang kakejau Kereng Balawan atawa lewu Baun Bango dengan Tasik Payawan atawa lewu Tumbang Pango, jakai itah mambesei murik bara Baun Bango atawa Kereng Balawan lebih 2 andau, mun Motor hujun danum kurang lebih 1 andau harun sapai. Tapi Kutat amun ie haguet mananjung mandui huang Goha te bara dukuh sana jadi ie mandui mules tinai haluli akan dukuh ee dia sampet keah balau takuluk ee masih bias ih ie sapai dukuh kilau eka te tukep.

Anak Kutat je bagare : SAHAWEI dia mandui danum tapi mandui apui. Amun ie handak mandui te ie mamehun, nyalan apui gandang-gandang ie te tangkeru sahewu hete. Eka bajuru mandui into Derep hulu sungei Manyu la ngaju lewu Tumbang Panggo. Huang saran Tasik Payawan ije bagare Teluk Embak hete atun pulau hete atun pulau pandung jete ije inyewut oloh : “Tajahan Teluk Embak” Tajahan te ayun tatu itah Kutat huran. Tajahan te paham bagana iete tatu oloh mite asep apui, amun andau jadi hamalem toto. Kanatek oloh mahining auh pander oloh, tau kea oloh ije malan badukuh bentuk alem salenga mahining auh kawan aso tenteng tajahan te. Sampai wayah toh oloh are paham mikeh dengan eka te

Gagenep tajahan ije bagana atun Antang ije inyewut oloh : Antang Tajahan. Antang Tajahan tuh ije bajuru ingahau/intehau oloh amun oloh Manajah Antang. Antang Tajahan Teluk Embak te inawan awi Kutat, sana ie dinun te ie manjawut tisin bulau/amas bara tunjuke palus majuke into pain antang te, limbah te ilapas ah tinai hayak inampa area.

Sinde andau kutat masuh hapan jukung tabalien “papan jahawen” ie sampai Kereng Balawan salenga melap-melap inyipet taloh bara hunjun petak. Mite damek bara lejak lacit sarupih jukunge tapi jatun ati je buah ie, inyipet awi Nyaring Menteng sampet due telu kadamek buah jukung, mite taloh ije kalute Kutat mambesei mules jukunge, inanatarang into saran petak palus manangkajuk lumpat manguang Nyaring te. Nyaring te hadari Kutat manduru gatung-gatung takajuk Nyaring gatung-gatung kea takajuk Kutat, randah-randah tangkajuk Nyaring te kalute tangkajuk Kutat tepa kea ie jake into Kereng Pangi. Kereng Pangi te into sungei Kalanaman tumbang sungei kalanawan langawa lewu Talangkah.

Mangkeme arep handak jake lalu ie mangkariak : “Umbet Kutat” Kutat manumbah : “dia ku umbet patei ku ikau sinde tuh” mangkariak tinai Nyaring te : “elaaa Kutat kareh aku manenga akam Penyang Karuhei Tatau Pasihan Belum Kutat manumbah dia aku puna ikau tuh patei ku!! Bapander tinai Nyaring : “ilaaaah kerei yaku manenga ikau “Penyang Panggering” lalu Kutat manumbah ; barangai ih amun kilau te balalu Nyaring manenga akae Penyang Pangering hayak hamauh : Yuh Kutat karak manuk mikeh antang oloh umba ikau, hindai oloh gite bitim lagi tarung saritam jadi giring buluh oloh

Kalute uluh mikeh toto dengan Kutat, elakan oloh mite biti lagi machining tarung sarita oloh jadi giring bulun uluh, basa ie puna oloh ije jadi mamut menteng indahang tinai penyang tengang nyaring menteng te

Jukung Kutat ije bagare : Papan Jahawen te, jukung ije inyarupih dengan papan tabalien telu silae, telu silae jete inyewut Papan Jahawen. Jukung te amun ie singgah dan lihi lumpat lalu leteng akan huang danum awi ie paham jalanen. Amun ie handak miar mahapae balalu inggatang inimba, kalute hante-hante tagal te ie manggarae aran jukung te Tambun Buruk Tanaei. Sinde andai ie handak mahapa jukung te mite jukung te salenga jatun. Gau hete-gau hete uras jatun jukung te Nihau, sampai hamalem andau Kutat batiruh hanupi hasundau dengan ganan jukung te : “Yaku tuh Kutat ganan jukung mu te, umbet nai ikau mahapan yaku. Yaku tuh buhau manangguh Tasik Manyu, mangaru nga Luwuk Tumbang Sungei Wulau jadi Biruk tapi tege tanda Kutat sampai anak esum kareh, amun are manjuhan, kalawau nga Tasik Manyu tuh are lumut likur ku te, ie mangusep likur ku te.

Maka toto kea sampai wayah tuh huang Tasik Manyu te kanateke are manjuhan dan kalawau dinun oloh tapi kanateke tau banyelu-nyelu dia lalau are oloh dinun manjuhan kalawau te***
(Sumber Buku Jereh Sahak Sahan dan Sahida Nakut)