TAMANGUNG PADURAN DARI KAHAYAN

A

mun itah mainga-ingat haluli karé késah tatu-hiyang ji inyampai éwén métuh itah kurik,  sahindai batiruh, Utus Dayak tuh, amun manyéwut arépeh kilau Utus Panarung, puna babuhan uluh ji biasa balayar. Puna Utus Palaut. Sansana Bandar, Késah Banama Tingang, Késah utus kalunén malihi Saran Danum Sangiang ka Saran Danum Kalunén, Késah Dué Hampahari Manduan Bara Pénda Kanian Jata Hung Hunjun Bukit Kinabalu, Késah Tangkiling, Késah Panéték Bukit Panimba Tasik, tau induan kilau piré-piré sonto a béwei. Késah Maharaja Panduran tuh, dia békén bara panambah kakaren sonto té.. Kakaren sonto ji mansuman basa Utus Dayak itah tuh,  puna Utus Palaut, Pandimpah Tasik ji Lumbah Haï.

Piré-piré ratus nyélu ji jadi nahalau. Hung ijé léwu mélai Batang Danum Kahayan, tégé ijé Tamanggung ji puna taséwut sampai piré-piré batang danum. Nyéwut ih aran Tamanggung tuh Tamanggung Kahayan. Awi ié punya paham taéwut. Sindé andau, Tamanggung Kahayan tuh mambései kabuat. Hung jalanaé, ié mimbit mandau, lunju, sipet tuntang badég. Mandau ah i andak hung laséh arut. Tamanggung mambéséi tuntang mambései sambil mangarungut kabuat mampahayk déhés ka ngawa. Baya riwut sungéi ji mangawal ié. Kanatek ah, tégé sindé-sindé tahining antang bahandang hung langit padang himba manumbah karungut Tamanggung. Atawa huréh bakéi bakara. Mahining uras te, Tamanggung manjadi batambah hayal. Awi kahayal ah, Tamanggung Kahayan salénga sampai ka tumbang sungéi ji puna lembah haï. Batang kayu himba hung sarae gin gitan manjadi kurik kilau batang papas ih. Manampayah té, Tamanggung taréwén isut.

“Akuilah mbuhen bu salénga jadi  sampai tumbang tu nah.” Tamanggung tatawé kabuat, balalu handak mumes mambéséi ka ngaju. Baya ampie kaharat Tamanggung masih hindai ulih manyama katamam. Tamanggung Panéték Bukit Panimba Tasik. Déhés tuntang galumbang tumbang lalau haï. Tamanggung métuh té tambah manjatu ka laut.

“Matéi aku,” Tamanggung bapander  sambil tatawé kabuat. Manantawé kalayae. Andau jadi haléméi. Matandau jadi dia gitan am awi langit babilem tanda akan dumah riwut haï tuntang ujan. Galumbang gin tambah hai. Manyau sakaulih ah mambéséi handak ka ngaju, Tamanggung Kahayan batambah kejau  bara tumbang. Tambah kejau hindai métuh narai talu ji ikéh ah, riwut haï dumah. Arut Tamanggung imanting galumbang ka hunjun ka ngiwa, ka sambil ka gantau. Kunju, sipet tuntang mandau ah tapanting ka danum. Balihi badeg ji hung kanai ihapit awi salawar ah. Baun matan tuntang karé salawar Tamanggung Kahayan lépah bisa. Laut kilau basingi atawa nahuang maningkes kaharat Tamanggung. Arut kurik Tamanggung lawi-lawie ah bakahém.Tamanggung puna tau hanangui, baya kilén ampie ia ulih hanangui manggau saran pétak atawa léwu. Awi té uka dia mimbing biwih arut  ah kilau palampung. Angat ah ji  handak imparahan  awi laut, langit  tuntang riwut ji maaduk danum manjadi galumbang kagantung huma hétuh akan Tamanggung, iété kaharat katamam kamamut-ménténg kalunen masih atun katapas ah. Manyau Tamanggung Kahayan puna jatun ji karé kalécak ah. Saha-harat, satama-tamam ah kalunen masih tégé hindai talu ji labih harat tamam bara kalunén hung panda langit tuh. Riwut galumbang haï nampara ranai. Hung kalawie ah, salénga kilau danum danau wei. Tamanggung Kahayan manahaséng sanang. Manatawé arép ah hindai.

“Kilen hurui bu salénga aku kilau tuh”, Tamanggung bapander kabuat. Kilau auh sansana kayau Uluh Katingan, basarah arep e ih umba panguasa ji ngambu tuntang hung jiwa ngiwa. Métuh té, langit nampara mamparaharan tanda matan andau dumah. Tampalawei harue nahalau. Bu salénga, tahining awi Tamanggung Kahayan tégé tandun manuk jagau bara kéjau. Mahining te, Tamanggung paham kahanjak atéi ah. Awi katawae ah, ia dia lalau kejau bara léwun uluh. Awi kahanjak ah, mahapan tisan katekang tulang tuntang katékang atéi ah, Tamanggung Kahayan mambaléh tandun manuk té dengan tandun kia.

”Kokorok kok…….”

“Kokorokok….” Tandun bara kéjau manumbah. Kaluté tandun hatumbah tandun. Piré-piré kali. Sampai hung lawin karé tandun té, ijé banama haï dumah manukép Tamanggung. Hung banama haï té tégé bapuluh biti haité. Upak éwén bile-bilem, dia kilau upak Tamangung Kahayan ji henda-henda  kilau upak langsat. Ijé biti hatué manjakah tali akan Tamanggung uka ié tau mandai. Limbah Tamangung jadi hung kapal, ijé uluh hatué békén, panjang haï, baangkul, salawar babilém, baju babilem, basansingut kilau tajin manuk parap, hamauh :

“En ikaukah ji manumbah tandun manuk té éndau?”

“Iyuh,” tumbah Tamanggung. Hatué panjang-haï basansingut te mangulim bajénta, mangguét takuluk ah kahunjun kapénda rangkah.

“Mbuhen ikau bu salénga kilau tuh?”

“Arutkuh bakahem awi riwut barat, Pahari.” Tamanggung lalu mangésah jalanaé bara léwue sampai laut balalu bakahém.

“Tau lah kétun manggau baju salawar kéang akan paharin itah tuh,” kuan uluh hatué basingut taji te. Ampi ié tambakas banama. Capat ih babuhan banama manggau ji ilaku awi tambakas éwen tuntang majuluk ah akan tambakas té.

“Amun maku, ikau tau mangganti kalambi salawarmuh ji bisa dengan pakaian tuh. Babilem uras, awi puna kilau tuh pakaian ikei hétuh. Ikau tégé hung Pulau Madura, Pahari. Ikéi tuh uras Uluh Madura”. Tamanggung manduan kalambi salawar ji injuluk awi tambakas banama Madura té. Hung atéi ah, Tamanggung hamauh, “Pulau narai hindai tuh. Kilen kakéjau bara Batang Danum Kahayan?”

“Aku bara Kahayan. Arangkuh Tamanggung Panduran. Inggaré uluh léwungkuh  Tamanggung Kahayan.” Tambakas Banama tuntang Tamanggung hatabé gancang. Hakaséné.

“Palus tame ka huang mangganti salawar-kalambimuh. Sadli, agah Tamanggung itah ka kamar  uka ié tau mangganti kalambi-salawar ah”. Hatué ji inyéwut Sadli magah Tamanggung tame. Limbah té, Tamanggung mahapan kalambi salawar babilem ji kéang. Tambakas banama manampayah Tamanggung hanjak:

“Bakéna ikau lah , Hari.” Babuhan Banama uras manampayah Tamanggung hung pakaian Madura. Uras gitan hanjak.

En itah masih tégé lawung Madura lah?” isek Tambakas Banama umba babuhae.

“Jatun,” kuan Sadli,.

“Damén ih,” Tambakas Banama balalu méngkak lawung ah, balalu mamasang lawung té intu takuluk Tamanggung. Manampayah té, babuhan Banama hanjak tutu. Basurak haya-hayak. Jatun ati ji manyuhu.

“Aré-aré tarimakasih, Durang Pahari.”

”Pas ih ikau jadi Uluh Madura. Ela-éla manampayah ikau karéh, anak bujang bawi raja ikéi, balaku Bapae manduan ikau jadi banae ah. Tau aré pangeran Madura ji akan bahiri dengammuh,” kuan Tambakas Banama.

“Aku aré-aré batarimakasih tagal jadi manduhup aku bara kasingin laut,” tumbah Tamanggung. “Aku dia akan mangalapéan kétun. Amun buli karéh, akan inyaritangkuh akan uluh léwu.” Mahining kutak “buli léwu,” Tambakas Banama tuntang karé babuhae salénga suni. Suni samasindé. Kilau laut limbah lépah riwut barat. Kahanjak hung matan éwen nihau.

“Mbuhen? En tégé talu ji sala hung kutak pandér ku lah? Amun tégé kasalangkuh, aku aré-aré balaku ampun maaf ih, “ Tamanggung manampayah Tambakas Banama tuntang karé babuhan ijé-ijé. Tambakas Banama manukép Tamanggung, mimbing bahue. Banama umbéséi babuhae manintu léwu. Matan andau jadi lembut mélai langit ji bahandang.

“Jatun, kasalammuh, Hari. Baya tégé adat ikéi hétuh ji dia mangat angat ah.”

“Manumun adat ikéi Dayak Ngaju, hung kuéh ikéi mélain atawa dumah, ikéi musti maréga adat uluh hété. Kaluté kia amun aku hung léwun kétun.”

”Yuh haratingkuh ih, Hari. Baya hung hétuh, éwéh kia ji manumbah tandun jagau, rimae ia misti batarung umba jagau léwun ikéi. Batarung sampai tégé ji matei. Awi té ikau gin kaluté kia. Itah dia katawan éweh ji akan matéi hung tarung té kareh. Kapéhé angat ah hung atéi limbah ikéi manduhup ikau, limbah té ikei manampayah ikau jatun am tahaséngmuh. Kila-kilau panduhup té jatun rimae. Kilau panduhup té dia sakuntep atéi.” Ooo, kalutékah?”

“Iyuh. Te adat ikéi hétuh.”

“Kilau kuangkuh éndau, ikei Uluh Dayak maréga hadat éweh kia, kaluté kia aku maréga hadat kétun.” Tamanggung Kahayan mangkétém Tambakas Banama. Tamanggung tuntang Tambakas Banama hakétém kilau dué kawal ji tahi dia hasundau. Hung takuluk éwen ndué tagitan matan-baun pampatéi. Ewen ndué mamaksa arep ah tatawe. Manyau gitan tatawé té tatawé masém bapait.

‘Kilau tanda tarimakasihkuh akan kétun, basa aku dia akan mangaléan kétun sampai lawin pambélumkuh, en taulah aku manari tarin ikéi. Kéléh itah tatawé bara manangis taharep narai kia ji dumah manalih.’

Tambakas Banama tuntang karé babuhae hayak-hayak basurak mampahayak kapal ji tarus imbéséi manintu léwu.

‘En kétun tégé pisau haï lah.’

‘Tégé,’ tumbah Tambakas. ‘Sadli, Nénga pisau ji té akan Tamanggung.’ Limbah mandinun pisau haï té, Tamanggung hung pénda tampayah Tambakas tuntang kakaré babuhae nampara manari. Manari Kinyah.

“Tamangung, ikei handak kia mamparahan tarin Uluh Madura akan, Pahari.” Epat biti hatué balalu kabaun, bapasang. Manari. Kilau musik ah, éwen mancatuk narai talu ji  tau icatuk. Matan-baun pampatéi lilap bara Banama ji tambah tukép dengan léwu. Hung saran jadi gitan uluh aré mentai.

“Sahindai itah marapat léwu, aku masih handak mangarungut. Karungut, lagu Uluh Dayak  hung piré-piré batang danum”. Tamangung masih handak mansanan kahanjak tarimakasih ah akan kakaré panduhup.

“Ayo bei,” kuan tambakas impahayak surak babuhae. Hung saran danum léwu uluh ji mentai pandumah Banama tanganga-nganga..

“Sapunae impahayak kacapi. Baya kilén ampie hindai. Ayo ih. Saulih-ulih ih,” Tamanggung nampara mangarungut :

Bua manggis bua dahian

 Aré tutu hung léwun ikéi

Kilen ampie andau harian

Dia kalapéan ketun sampai matéi

Panduhup kétun panduhup haï

Dia taréga intan bulau

Tarimakasih durang pahari

Hasupa tinai hung léwu kéjau

Uluh ji mentai pandumah Banama manampayah karami mélai Banama tambah tanganga-nganga awi éwén katawan katawan tutu Banama te ka laut manduan bakal musuh jagau taharat éwén. Dia é kawal léwu. Hung jagau taharat té, taimbit régan léwu tuntang éwén kabuat. Régan hadat tuntang hambaruan éwén.  Sahindai marapat, Tambakas mantéhau Sadli, “Sadli mbungkus tuntang lian kalambi salawar Tamanggung ji bisa éndau.” Sadli malalus narai taluh ji inyuhu awi Tambakas. Manjuluk kalambi-salawar té akan Tambakas. Tambakas manénga bungkusan té akan Tamanggung.

“Paharingkuh, amun maku, aku akan hanjak tutu jakaé Pahari maku manduae kilau tanda tarimakasihku tuntang tanda kea itah puji hasundau. Eweh katawan narai taluh ji akan dumah limbah tarung ji kuamuh nah. Tambakas manampayah matan Tamanggung. Manduan bungkusan, balalu mangkétém Tamanggung. Babuhan Banama nihau karé kutak pander éwén. Banama marapat tuntang injarat. Surak uluh ji mentai pandumah Banama imbit riwut laut ka hunjun langit. Tamanggung mahapan kalambi lawung Madura, tuntang Tambakas Banama mananjung habambai.

“Kakuéh itah?” isek Tamanggung.

“Manyundau Raja. Aku musti malapor, mansuman basa ikau ji éndau bahanyi manumbah tandun jagau ikéi.”

“Ooo. Sapunae aku manumbah tandun jagau te éndau tagal kahanjakkuh ih. Samasindé  jatun tirukkuh handak bakalahi atawa manggau pampatéi. Katawammuh? Aku handak bélum tuntang buli léwu.”

”Katawangkuh, Hari. Aku gin handak bélum. Aku nahuang mawi pambélumkuh kilau kalunén biasa. Katawammuh, tagitang-gitangkuh métuh tuh aku tégé anak, tégé kabalingkuh. Aku bangang dengan anakkuh. En ikau tégé sawammuh jadi?”

“Jatun. Hindai. Baya mbuhén ikau hamauh, aku gin handak bélum?”

”Nah itah jadi sampai.” Numummuh ih narai taluh ji awi ku lah,” kuan Tambakas hung suara ji kurik. Kilau habisik.

“Yuh.”

Tamanggung ingawal awi Tambakas Banama tame ijé kamar haï. Hung hété jadi munduk ijé hatué bakas baya gitan barigas kuat. Sansingut ah baputi. Kagantung ah sada-sadang. Hung takuluk ah tégé mahkota. Silae, tégé dué bawi. Ijé tabéla. Bakena. Ije bakas. Kabalin Raja. Kanih-kanté tégé hatué-hatué tabéla. Bajaga-jaga. Manampayah Tambakas tuntang Tamanggung tame, Raja manénga tanda uka hatué-hatué tabéla té balua.  Tambakas munduk basujud, inumun awi Tamanggung.

”Paduka, aku dumah mampakaséne, uluh ji manumbah tandungkuh hanjéwu tuh.”

“Ewéh arae, bara kuéh?’’

”Arae Tamanggung Panduran bara Batang Danum Kahayan. Ié bakahém hung laut métuh dumah riwut barat galumbang haï.”

“Bapakaian-balawung Madura?”

”Yuh, Paduka. Aku ji manéngae, awi pakaiae lépah bisa jamalé-malém.”

“Jadi kétun manyarungan ié? Ela mampahawén itah.”

”Jadi Paduka.”

”Tamanggung, méndeng ih ikau. Angatkah basujud manyembah kilau Panglima ikei (maninjuk Tambakas) dia hadat kétun.”

“Ikau méndéng ih, Hari,” Tambakas mambisik Tamanggung ji gitan ragu. Masih munduk manumun Tambakas. Hung atéi Tamanggung lémbut pisek, “Jadi Tambakas tuh Pangkalima Madura ampie? En dengae kah kareh aku batarung?”

“Méndéng,” kuan Panglima sambil mangarutis kanain Tamanggung. Tamanggung tapaksa méndéng. Raja, kabalin Raja tuntang bawi tabéla hung hila sambil Raja manampayah Tamanggung bara balau sampai pai ah. Tambakas umba kia suni-suni manampayah ah.

“Jatun harapan aku manang basaing  manduan puteri raja akan kabalingkuh,” kuan Tambakas hung atéi ah. Tambakas masih taingat basa Puteri Raja sampai andau-além tuh hindai manénga tanda tagal ié maku dengan Tambakas. Manyau Tambakas Panglima Raja.

“Hanjak hasundau dengammuh hung léwun ikéi, Tamanggung Panduran. Aku puna dia puji dumah kan léwun kétun. Baya tégé tahining kamamut-ménteng babuhan kétun.”

“Aré-aré tarimakasih, Paduka. Aré balaku ampun amun tégé pander atawa panggawingkuh dia manunun hadat hétuh. Awi aku puna hindai katawan.” Tamanggung manampayah  Tambakas munduk, takuluk ah manampayah penda. Baya sindé-sndé ia manaka-nakau manampayah Puteri Raja. Atéi ah tagérek manampayah kakénae. Tamanggung handak munduk, baya Raja hamauh.

“Nauh ah ih. Panglima mawi narai taluh ji kuan hadat ikei. Tamanggung méndéng ih.” Tamanggung méndéng haluli. Puteri Raja manampayah Tamanggung hung pakaian Madura  tahi-tahi. Jatun ji katawan narai taluh ji huang atéi ah.

“Tamanggung Panduran, aku musti mansanan akammuh. Manumun hadat ikéi hétuh, éwéh kia ji manumbah tandun jagau, rimae ia manantang jagau ikei, ie te panglima ikei ji paling harat. Panglima ikei te dia békén bara Tambakas Banama. Awi te ie kia ji manduan ikau éndau bara laut.”  Tamanggung paham kataréwén manyénéh basa Tambakas ie te Panglima Harat Madura. Umba éwéh ie akan bakalahi sampai matéi. Tamanggung nampara harati riman pander Tambakas éndau basa ie handak bélum kia, nahuang belum dengan anak-kabalie. Bangang dengan anak ah. Enkah métuh bapander kalité, mélai atéi ah atun dumah raja pampatéi?”  Tamanggung mangkémé atéi ah tahimang. Mbuhen ie musti bakalahi sampai ati ji matéi dengan Tambakas? Eweh ji paling bahalap matéi bara ikéi badué? Manampayah kasuni Tamanggung, Raja haluli hamauh,

”Aré-aré balaku maaf umba Tamanggung, baya kaluté ampie adat ikei bara bihin.”

“Iyu , Paduka. Haratingkuh ih. Aku marega hadat kétun.”

”Jéwu Tamanggung tuntang Panglima ikéi batarung hung ije rumbak, ji akan jadi kuburan éwéh ji matei hung tarung té. Ji manang akan manjadi banan anakkuh tuh.” Maninjuk bawi tabéla hung silan sambil ah. Basi tabéla te suntup. Tamanggung manampayah ah sahindai basujud manyuhukan taluh ji ingkémé hung atéi.

“Paduka, ampun baribu ampun. Kilau sala pander, aku balaku, éla aku ji batarung dengan Tamanggung. Haï kaharapkuh uka jagau itah ji békén ji batarung?” Tambakas manyangkélang pander Raja. Mahining auh té, Raja tabényém hanjulu. Dia mangira Tambakas akan mampalua palaku té.

“Mbuhen, Panglima?”

“Sindé hindai ampun baribu ampun, Paduka. Aku mangkémé dia ulihkuh batarung dengan Tamanggung limbah aku manduhup ie balua bara bahaya léténg.”

“Baya tuh hadat itah, Panglima. Hung hadat tuh tégé régan arep itah handiai. Tandun manuk jagau jadi inumbah dengan tandun. Kéléh matéi bara bélum dia baréga.”

“Ampun, Paduka. Tamanggung dia mangatawan hadat itah te. Ié gin jatun tirukkah mamparandah itah. Ié manumbah tandun té tagal kahanjak ah wei.”

“Panglima,  amun ikau dia maku batarung, hung kuéh aku maandak matan baungkuh taharep uluh léwun itah? Uluh léwun itah uras mangatawan hadat jituh bara huran?” Raja bényém hanjulu gitan bapikir. Limbah té Raja hamauh haluli,

“Panglima, haratingkuh narai taluh ji ingkémémmuh tuntang taluh ji mikirmuh. Baya aku dia ulih manggantimuh umba uluh békén. Kilén ampie léwu tuh amun itah dia maréga hadat. Sama ih kilau itah dia maréga arep itah tuntang tatu hiyang itah kabuat.Aku baya tau batahan umba hadat. Awi té jéwu ikau musti batarung kilau jagau takahalap takaharat itah. Jituh kaputusangkuh “

“Iyuh, Paduka,” Tambakas manumbah. Dué matae manampayah penda.

“Jewu hanjéwu,” kuan Raja hindai, balalu méndéng malihi kamar haï té impahayak awi Permaisuri tuntang Tuan Puteri. Sahindai lilap ka léka békén, Tuan Puteri sampét sindé hindai mambalik bitie manampayah Tamanggung.

“Aku jadi kalah,” kuan Tambakas hung atéi ah kabuat. “Narai gunae bélum jadi Panglima amun Tuan Puteri dia maku dengangkuh.” Kaluté Raja haguét bara kamar haï, Tambakas méndéng. Haya-hayak Talanggung balua kia.

“Mbuhen, Pahari? Dia mansanan akangkuh bara Banama endau basa kué akan hataharep. Jakae kutawan aku dia akan maku iangkat kan Banama. Kéléh aku matéi hung laut ih bara aku bakalahi dengan uluh ji manduhup aku.” Tambakas suni wei.

“Hiningmuh lah,” Tamanggung isut basingi awi kabényem Tambakas.

“Manumun ikau, en kué tau mamilih taluh ji békén lah. Hapan takulukmuh tuh.” Tambakas  manulak takuluk Tamanggung umba tinjuk ah. Limbah té kadaduée suni iimbit awi pikiran éwén kabuat-kabuat. Kéjau. Jatun ati ji katawan. Baya éwén dué ih kia. Sampai ka ijé léka hung kuéh Tamanggung batiruh, Tambakas hamauh pandak,

“Além tuh aku batiruh umba ikau,” Tamanggung baya manampayah Tambakas.

“Kué sama-sama manaharep jéwu kilau dua hampahari. Narai kia ji manaharep kué, éwéh ji bélum musti mangésah kapaharin kué akan anak-ésun itah harian. Uka éwén éla sampai kilau kué ji musti bakalahi dia barima sampai matéi.” Tamanggung manékap léngén Tambakas kuat-kuat awi lépah pander ah.

“Hiningmuh?”’ kuan Tambakas.

“Hiningmuh? Jité kia pétéh ayungkuh,” tumbah Tamanggung.

Sungsung. Matanandau masih randah. Alun-alun jadi rami. Kuntép dengan uluh léwu ji handak manampayah tarung Tambakas umba Tamanggung. Raja, Permaisuri tuntang Tuan Puteri hung balkon. Hung saran rumbak ji jadi iawi, Tambakas tuntang Tamanggung méndéng habambai manaharép balkon.

“Aku dia maku batarung sampai matéi  kilau tuh dengammu, Hari,”  kuan Tamanggung umba Tambakas hung suara ji randah. “Tarung macam jituh sama ih kilau manyuduk baun-atéi ah kabuat. Tarung dia barima samasindé.”

“Kué jatun ati jalan békén, Hari. Kué jadi kalah sahindai batarung. Baya narai kia ji lalus limbah tuh karéh, ji bélum musti mangésah akan anak-ésun itah basa kué hampari. Dia e due kalunén ji bamusuh.”

“Iyuh, Hari. En ikau basumpah kia macam té?”

“Pampatéi jadi hung baun kué, Hari. Aku basumpah.” Suni-suni, Tambakas tuntang Tamanggung hatékap tunjuk kilau hansuman pikiran tuntang taluh ji ingkémé éwén badué taharép pampatéi ji puna jadi tukép  paï.

Bara hunjun balkon, Raja jadi manénga tanda uka tarung inampara. Piré-piré hatué tabéla gagah dengan karé kalinga mampahiau tarompet. Limbah té ijé tahining hiau garantung haï basusara randah  imantu. Hiau garantung te mandaï ka hunjun langit, tamé ka béntuk uluh aré hung alun-alun. Garantung pampatéi dia barima akan Tamanggung tuntang Tambakas. Garantung régan arép akan adat tuntang uluh léwu. Puna rancak hung pambélum, hukum, hadat atawa narai kia arae, manyau jadi tapalihi tatap ih ihapan kilau taluh ji buah katutu. Tatap kia ilalus, manyau sapunae palalusan té mawi kalunen dia baatéi. Mawi kalunen jadi masin Uka maubah taluh ji tapilihi atawa manénga atéi akan kalunen, rancak parubahan té balaku saki palas umba daha kia.

Hung lawin suara garantung, Tambakas tuntang Tamanggung suntup ka hila balkon. Manénga hormat akan Raja, Permaisuri tuntang Tuan Puteri, impahayak awi surak uluh aré. Limbah té, Tamanggung tuntang Tambakas manduan léka ka lawin-lawin rumbak tarung  ji akan jadi kuburan éwéh ji matéi. Sahindai hapisah manduan lawin rumbak je hasansila, Tambakas hamauh,

“Hari, sampai wayah ah am kué manumbah pisek kilén ampi bélum tuntang matéi baréga.”

“Iyuh, Hari. Bélum tuntang matéi baréga sampai lawin tahaséng.”

“Has ah Hari,” kuan Tambakas .

“Has ah, Hari.,” Tamanggung tuntang Tambakas nangkajuk ka huang rumbak pampatéi. Bara balkon sampai alun-alun ji haï sama sindé jatun suara.

Tambakas tuntang Tamanggung hataharep hung rumbak tarung ji puna pas kahain rumbak kubur. Uka mambalik biti gin bahali,

“Aku dia maku bakalahi dengammuh, Hari. Ikau jadi manduan aku bara léngén pampatéi   métuh aku hung laut.”

“Aku gin dia maku, Hari,” tumbah Tambakas. “Jatun manae kué hampatéi kulae. Baya ijé bara kué musti balua bélum bara rumbak tuh.” Tambakas tuntang Tamanggung hakétém kulae awi sama-sama katawan pampatéi jadi puna naharép manunggu éwén ndué. Limbah malapas kétém, Tamanggung mampalua badeg Kahayan ah bara kahang ah. Badeg té lalu injuluk ah akan Tambakas.

“Nyuduk aku, Hari. Hétuh,” Tamanggung maninjuk baun atei ah. Tambakas manduan badeg Kahayan té  Kilau kilat ie balalu manyuduk baun atéi ah kabuat. Handalém. Sampai sémpak. Daha bahandang manyambur balua kabaun Tamanggung tuntang bitin béréng Tambakas. Manampayah kaslénga tuh, Tamanggung mangkariak gancang kilau manyingi marabit langit,

“Hariiiiiiiiiiiiiiiiiiiiiiiiii…. Hariiiiiiii,” Tamanggung manjawut badeg bara baun atéi Tambakas ji balalu manjatu ka usuk Tamanggung. Biwih ah makumi. Matae kilau kambang nampara balayu.

“Kué manang, Hari. Bélum tuntang matéi baréga. Ela ngalapéan sumpah kué lah. Ngesah akan anak ésun itah basa itah hampahari.” Tambakas manékap léngén Tamanggung kilau uluh manabé malu permisi haguet kéjau. Umba dawén léngé, Tamanggung manutup dué matan Tambakas.

“Hariiiiiiiiiii.”

“Hariii…” kariak Tamanggung dengan kakaré kahimang atéi ji handalem. Tahi Tamanggung manampayah baun betin Tambakas sambil mamparéndéng arep ah. Hung luar rumbak, jatun tahining suara sama sindé. Limbah té, Tamanggung manggatang bitin Tambakas ka saran hung hunjun rumbak. Harue ie nangkajuk kahunjun. Mamangku bitin Tambakas. Sambil manampayah ka hila balkon. Silan léngé ka langit.

“O, Hatalla Ranying panguasa matanandau bulan pambélum, aku anakmu bara batang danum Kahayan balaku ikau mimbit buli paharingkuh tuh ka Saran Danum Sangiang. Aku balaku akae léka ji bahalap.” Tamanggung méngkak kalambi babilém ji inénga awi Tambakas métuh hung Banama. Inggulung ah manjadi bantal takuluk Tambakas. Tamanggung méndéng pander isut akan uluh aré hung alun-alun:

“Tambakas tuh paharingkuh. Itah tuh hampahari. Aku balaku éla sampai ati kalahi dia baguna macam tuh péa kia. Aku balaku duhup uka paharingkuh tuh ingubur kilau anak takahalap léwu jituh.” Limbah té Tamanggung manjakah badeg ah ji badaha ka laut. Tamanggung manggatang bitin Tambakas ka balkon. Manjulukkah akan Raja.

“Paharingku tuh puna panglima Raja ji takaharat, anak léwu takahalap. Labih bara té, ie anak Utus Kalunén.” Tamangung manyium lingkau Tambakas. Mananjung balua malihi balkon tuntang alun-alun. Babuhan Banama ji umba Tambakas dumah mampahayak Tamanggung. Uras jatun pander ah. Suni. Mananjung mampahayak Tamanggung ji dia habaju. Biti ah  badaha-daha. Dahan Tambakas.

***

Jewue. Limbah pampatéi Tambakas. Raja mamimpin kabuat upacara panguburan Tambakas. Tamanggung kabuat umba paling baun métun kangkurung. Sahindai rumbak kuburan inutup umba pétak, Tamanggung balaku  isut katika umba Raja uka tau  bapander taharép uluh aré:

“Durang pahari handiai. Aku Tamanggung bara Pétak Danum Kahayan tuntang Paharingkuh liau Tambakas tuh, puna dia maku bakalahi. Kaadaan tuntang hadat mamaksa ikéi badué baya ijé biti ih balua bélum. Ikéi badué tatap dia maku bakalahi. Aku mangkémé, Tambakas labih baguna bélum hétuh bara aku. Awi té, aku manénga badég hung kahangkuh akae uka manyuduk aku hétuh hung baun atéikuh. Baya capat kilau kilat, limbah ie manarima badégkuh, ié manyuduk baun atéi ah kabuat.  Sahindai malihi itah, Tambakas hamauh dengangkuh: “Kué jadi mangalah pampatéi, Hari.” Taharép pampétéi ji mentai ikéi huang rumbak tarung, ikéi badué jadi basumpah: uka  éwéh kia ji belum musti pétéh tuh: Ela hindai itah hampahari bakalahi sampai tégé ji matéi. ji jatun rimae samasindé. Cukup ih ikéi badué.”

Uras ji manyénéh kutak pander Tamanggung, suni. Jakae tégé dawén kayu manjatu métuh té, panjantue dawén té akan tahining. Karé kahanjak kilau takubur umba Panglima. Manampayah karé kaadaan macam té, balalu Raja manduan kaléka ji gantung isut, ijé ungguh balalu hamauh:

“Durang pahari uluh léwu handiai,

Aku kilau rajan kétun, uluh ji manjaga tuntang malalus hadat léwu, limbah pumpung dengan pambakas léwu , karé penaséhatkuh, andau tuh manduan kaputusan:

Kaijé, manénga galar pahlawan taharat akan liau Tambakas.

Kadué, Limbah té, aku nampara andau tuh kia maangkat Tamanggung manjadi gantin Panglima.

Katélu, kilau jadi injanji ji bélum baru tarung rumbak akan kawin dengan Tuan Puteri, ié té anakkuh. Hung tarung rumbak sindé tuh jatuh ati ji manang jatun ati ji kalah. Kadadué manang. Baya ji bélum ié té Tamanggung Panduran. Andau kawin télu puluh andau limbah tuh. Nikah tuh kilau tanda kea basa dué utus itah: Uluh Kahayan tuntang Madura, uluh hampahari.”

Limbah manyampai kutak-pander te, Raja muhun bara pétak ungguh, malihi liau Panglima batiruh katatahie. Babuhan Banama tuntang Tamanggung mananjung, buli ka Banama, ji wayah tuh nyéwut itah “Arut Madura.”

Kilau jadi injanji awi Raja, ijé bulan limbah Panglima Tambakas nihau, Karajaan mawi Pesta Kawin Tuan Puteri dengan Tamanggung. Hung atéi ah, Raja handak manduan Tamanggung jadi panggantie ah, amun ié dia ulih ah hindai mimbing Karajaan awi kabakas umur. Sahindai kawin, Tamanggung masih manalih kubur Tambakas mansanan sambil balaku dua. Haluli, Tamanggung manampayah baun, bitin béréng Tambakas manyundau mangkétém bitie. Tahini-hining ah Tambakas hamauh dengae, “Aku balaku kué tatap satia sumpah, Hari!”

“Iyuh, Hari.” Tambakas balalu lilap. Hung upacara nikah cara Madura, Tamanggung mambisik kabalie Tuan Puteri,

“Angatkuh Andi katawan basa Liau Panglima, paham kasintae denganmmuh. Paham kanahuang ah manduan Andi kilau kabalie ji manéngaé anak-sili.”

“Iyuh katawangkuh, Ka. Aku mamilih Kaka, andau tuh aku jadi kabalin Kaka, Kaka jadi kabalingkuh, jatun uluh békén.” Tamanggung mahémés tinjuk Tuan Puteri.Hanjak. Kadué mataé kilau matanandau hung langit atéi Tamanggung.

Raja manénga Tamanggung kadududukan tuntang galar Maharaja Manén Panduran. Awi té hung léwu kurik té sampai andau-além tuh, Tamanggung ingaséné uluh kilau Maharaja Panduran.

Dia piré katahie limbah kawin, Tuan Puteri mimbit arépeh. Tamanggung balaku permisi umba Raja uka tau buli ka Kahayan dengan karé anak-kabalie. Babuhan Banama umba kia. Dia maku mélai hung Madura. Uras éwén té manétép hung léwu ji sampai wayah tuh bagaré Panduran mélai Batang Danum Kahayan.

Manyau kilén kia kahain riwut barat bara hila kuéh kia pandumah ah, Manén Panduran masih tégé hung kalékae. Pampatéi jadi mampéndéng damai kadué Utus ji jadi inyaki imalas umba daha kadadue. Pambélum dia léténg.***

Pansanan:

·   Ejaan ji hapangkuh hung késah tuh  manumun Ejaan Bahasa Indonesia yang Diperbaharui tuntang manum  auh pahining tuntang manyéwut karé kutak hungga basa Dayak Ngaju.Awi té aku dia mahan O hung kutak Uluh, tapi O. Angatkuh manyurat Uluh dengan Oloh tuh cara ji hapan ahli bara Jerman bihin . Tagal te aku mangkémé, itah pun a baguna amun tau hasundau, hung ije pumpung haï éka manahiu Basan Uluh Itah, kilau narai ji jadi awi tatu hiyang itah mélai Penda Kacapi bihin métuh wayah Sarikat Dajak nyélu 1919.

·  Hung késah tuh  kia, aku gin mamparahan kabékén I bara Ï (I titik dué hung hunjun).

·  Manumun buku-buku antropologie hung Eropa Barat, Uluh Jawa mangaséné kataun menyuhup sanaman bara Uluh Dayak. Kaluté kia kuan antropolog Jan Avé ji puji mawi panelitian hung Kalimantan Tengah déngangkuh métuh ikéi hasupa hung Paris, Perancis . Ela-éla ji mimbit katau tuh ié té Maharaja Panduran limbah ié kawin umba Tuan Puteri. Manumun buku-buku antropologi Barat, Surabaya dia é Léwu Bajaï (Kota Buaya) tapi baasal bara kutak Sur Bajé (Sungai Besi). Kataun mawi sanaman tuh limbah Jawa Timur penda raja-raja Mataram iimbit awi raja-raja Jawa Tengah ka Jawa Tengah. Mélai hétuh karis (keris) Jawa inampara lémbut tuntang manduan jalae kabuat-kabuat. Hung Madura sanaman tuh iawi éwén manjadi clurit ji iindak hung likut, kaluté kia karis iindak hung likut. Amun mandau itah, iméténg intu kahang, badég  hung kahang kia. Léka maandak  karé sanjata jituh, uras tégé rimaé kia. Sampai andau além tuh jatun ati ijé sarjana Barat, Timur, atawa  Indonesia, labi-labih Uluh Itah éji jadi mawi panilitian tutu-tutu taharép pakara tuh.

(Di Ambil dari Jurnal Toddopuli, Oleh Kusni Sulang)